തിരുവമ്പാടി ഹൈസ്കൂൾ റോഡിൽ ഫെഡറൽ ബാങ്കിന് സമീപം മദ്യ ലഹരിയിൽ സ്ത്രീകളെ ആക്രമിച്ചു എന്നാണ് പരാതി.ഇന്നലെ വൈകുന്നേരമാണ്
ആക്രമണം നടന്നത്.
മദ്യ ലഹരിയിൽ എത്തിയ തിരുവമ്പാടി അമ്പലപ്പാറ സ്വദേശിയായ യുവാവാണ് ഇതുവഴി പോവുകയായിരുന്ന രണ്ട് സ്ത്രീകളിൽ ഒരാളുടെ മുതുകിനിട്ട് ചവിട്ടിയത്.
ചവിട്ടേറ്റത്തിന്റെ ശക്തിയിൽ സ്ത്രീ നിലത്തേക്ക് തെറിച്ചുവീണു.
സംഭവത്തിന്റെ സിസിടിവി ദൃശ്യങ്ങളും പുറത്തുവന്നിട്ടുണ്ട്.
തുടർന്ന് ആക്രമിക്കപ്പെട്ട സ്ത്രീകൾ തിരുവമ്പാടി പോലീസ് സ്റ്റേഷനിൽ എത്തി പരാതി നൽകി.പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്.കൂടാതെ ആക്രമണത്തിന് ഇരയായ സ്ത്രീകളെ ആശുപത്രിയിൽ എത്തിച്ച് പ്രാഥമിക ചികിത്സയും നൽകി.
ആക്രമണം നടന്നിരുന്നതിന് തൊട്ട് സമീപത്ത് തന്നെ ബീവറേജ് ഔട്ട്ലറ്റ് പ്രവർത്തിക്കുന്നുണ്ട്.
ആക്രമണത്തിന് തൊട്ട് മുൻപായി സ്ത്രീയും ഇയാളും തമ്മിൽ വാക്കു തർക്കത്തിൽ ഏർപ്പെടുന്നത് സിസിടിവി ദൃശ്യത്തിൽ പതിഞ്ഞിട്ടുണ്ട്.ഇതോടെ സ്ത്രീ ചെരുപ്പൂരി യുവാവിനെ അടിക്കാൻ ഒരുങ്ങുന്നതും ദൃശ്യങ്ങളിൽ വ്യക്തമാണ്.അതിനുശേഷമാണ് യുവാവ് ഓടിയെത്തി സ്ത്രീയെ ചവിട്ടി വീഴ്ത്തിയത്.
അതേസമയം മദ്യപാനിയായ യുവാവും സ്ത്രീയും തമ്മിലുള്ള തർക്കത്തിന്റെ കാരണം വ്യക്തമായിട്ടില്ല.
ഇരുവരും നേരത്തെ പരിചയമുള്ളവരല്ലെന്നാണ് പ്രാഥമികമായ വിവരം.എത്രയും പെട്ടെന്ന് കുറ്റക്കാരനെതിരെ ശക്തമായ നടപടി ഉണ്ടാകുമെന്ന്
തിരുവമ്പാടി പോലീസ് ഇടിവി ഭാരതിനോട് പറഞ്ഞു.